រុស្ស៊ី៖ ភ្នាក់ងារទំនាក់ទំនងរុស្ស៊ី Roskomnadzor បាននិយាយកាលពីថ្ងៃអង្គារថា ខ្លួនចង់ឱ្យ Wikipedia ដកចេញនូវព័ត៌មានមិនត្រឹមត្រូវដែលប៉ះពាល់ដល់ផលប្រយោជន៍សាធារណៈអំពីស្ថានភាពនៅក្នុងប្រទេសអ៊ុយក្រែន។ ភ្នាក់ងារនេះបានចោទប្រកាន់ Wikipedia ពីបទបង្ហោះព័ត៌មានមិនពិតលើអ្វីដែលរុស្ស៊ីហៅថា «ប្រតិបត្តិការពិសេស» របស់ខ្លួនក្នុងប្រទេសអ៊ុយក្រែន និងលើសកម្មភាពរបស់យោធារុស្ស៊ីផងដែរ។

ប្រភពដដែលបានបញ្ជាក់ថា យោងទៅតាមច្បាប់របស់រុស្ស៊ី អ្នកដែលមិនលុបព័ត៌មានខុសច្បាប់នៅពេលស្នើសុំឱ្យធ្វើដូច្នេះដោយ Roskomnadzor អាចត្រូវបានពិន័យជាប្រាក់រហូតដល់ ៤លានរូប្លិរុស្ស៊ីដែលស្មើរ៊នឹងប្រមាណ ៥ម៉ឺនដុល្លារ។

គួររំលឹកដែរថា រុស្ស៊ីបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែនកាលពីថ្ងៃទី២៤ ខែកុម្ភៈ ដែលបង្ករឱ្យមានការតស៊ូរបស់អ៊ុយក្រែនយ៉ាងជាខ្លាំងប្រឆាំងនឹងរុស្ស៊ី ខណៈទណ្ឌកម្មជាច្រើនត្រូវបានដាក់ទៅលើរុស្ស៊ីពីសំណាក់លោកខាងលិច៕